邵善波回應夢熊：我個位咁低 佢邊肯做？

【明報專訊】中央政策組首席顧問邵善波噚日去咗新民黨周年晚宴，唔少人都好關注中策組來年部署，特別係「梁粉」劉夢熊早前踩中策組邵善波「政治不成熟」，又話特首「梁振英唔用我係佢嘅損失」，但波叔開口提醒Emily，夢熊已做過非全職顧問喎。有人就笑笑口問波叔，全職顧問未做過呀！點知波叔答得仲妙，反問「（全職顧問）呢啲咁低嘅位，佢（夢熊）邊肯做」。


之前有報道話波叔想大減中策組非全職顧問數目，仲會減一半咁多，但波叔噚日就同Emily講，話其實唔會減一半，只會減到剩番20、30個咁上下，但以中策組40幾個非全職顧問計，都算係大手術。施政報告周三公布，有記者關注波叔有冇贈番兩句畀特首梁振英用，等佢可以喺立法會度出吓位，但波叔笑言，近日流傳嘅「全民搵地」已經係金句，反問記者「仲唔夠？」