毓民話大班「還聲於共」

【明報專訊】人民力量黃毓民過去與「大班」鄭經翰合作無間，曾力撐佢任台長嘅數碼廣播電台（DBC）。不過，毓民噚日喺立法會資訊科技及廣播事務委員會上，就批評大班「還聲於共」。


議員要求質詢黃楚標

大班將會出售DBC嘅股份畀股東之一嘅政協黃楚標，工黨何秀蘭噚日喺會議上話，由於當中涉及傳媒機構嘅股權轉讓，基於公眾利益，立法會應該邀請DBC幾個持份者到立法會接受質詢，唔少委員都同意，仲認為最好請到黃楚標上嚟對質。


身為委員會主席嘅毓民聽到大班個名，就話當DBC聲稱受到政治打壓時，立法會曾為佢哋開咗兩次特別會議，請晒班官員畀佢哋質問，但鄭經翰家收咗錢後就「還聲於共」，而唔係還聲於民。


查實毓民唔係第一次鬧大班，早前曾撰文批評大班當初將DBC風波定性為「政治打壓」，動員群眾為言論自由而戰，如今咁做等同利用群眾，將佢哋視為收番幾千萬蚊股本嘅籌碼。