民建聯賣蛇齋餅糉福袋

【明報專訊】下個月就係農曆新年，各個投咗年宵攤位嘅政黨都積極做好準備。新一年係蛇年，被網民嘲笑搞蛇齋餅糉嚟爭取選民支持嘅民建聯，今年就自嘲一番，除咗無懼狙擊重返維園外，今年嘅主題更係「點只蛇齋餅糉咁簡單」，名正言順大賣蛇齋餅糉福袋，入面有蛇年利市封、冬菇、曲奇餅同瓜子，每個盛惠50蚊。


稱搵老友入貨 唔使貼錢

家百物騰貴，冬菇、曲奇餅等都唔平，唔通民建聯真係賣大包，用蝕本價「益街坊」？民建聯常委葉傲冬話，民建聯唔需要貼錢，因為搵到老友，所以全部都係用成本價入貨，先至可以做到咁平嘅價錢。


佢話今年係蛇年，除咗自嘲外，亦希望大家更清楚民建聯工作，唔係只得蛇齋餅糉咁簡單喎。佢強調，其實蛇齋餅糉好受街坊歡迎，民建聯一直唔係偷偷摸摸去做。


副主席張國鈞話，今次重返維園都係做番好自己工作，但就話春節都係開心日子，希望其他人做乜都好，最緊要係大家開心。除咗福袋之外，民建聯亦會賣印有「點只蛇齋餅糉咁簡單」嘅T恤，同樣50蚊件。


民建聯向來富有，但連佢哋都嫌年宵攤位貴，佢哋透露攤位要成4.5萬蚊租，過往佢哋都希望空間大啲，選擇租兩個攤位，但今次太貴租，所以只能競投一個單邊攤位。