西九大戲棚加故宮特色

【明報專訊】西九文化管理局舉辦嘅《西九大戲棚》今年捲土重來，大家行經廣東道西九附近已可見到戲棚輪廓，今年嘅戲棚唔止竹棚咁簡單，仲加入咗好多故宮建築特色嘅宮廷元素，戲棚主色係金黃色，負責設計嘅建築師林偉而話，希望個設計可以吸引多啲人嚟睇戲。其實大戲棚已經賣咗七成門票，有啲熱門場已經爆咗，想睇嘅市民要早撲飛嘞！


部分場次已爆

至於戲棚設計，林偉而話用咗約1000條杉同1萬支竹，以民間搭棚技術搭建；戲棚講究對稱，於是參考咗北京故宮等傳統建築物，採用3層嘅金黃色宮殿設計，並擺放傳統巨型花牌以添氣氛，燈光、擺設盡量細緻，以繼承傳統文化，希望吸引年輕人進場。


今次仲突破傳統，引入高科技「AR Code」，市民用平板電腦或智能手機下載應用程式，用「AR Code」一掃戲棚前嘅花牌，屏幕上就即時呈現未來戲曲中心嘅立體設計圖，令市民感受新舊共融。戲棚外今年多咗26個攤檔，賣傳統小食及手工藝品，包括麵粉公仔、木刻書法等，市民唔睇戲都可以買吓嘢。