勞聯包場40蚊睇《一代宗師》

【明報專訊】政黨地區工作不可或缺，不過要引起話題，有時都未必要使好多錢，好似王家衛新作《一代宗師》上畫，勞聯近日就搵咗九龍灣影藝戲院包場睇新戲，聽聞唔少會員都好歡迎。勞聯嘅立法會議員潘兆平話過往勞聯都搞過類似電影會，但無乜擺過錢落去，因為會員本身都要收40蚊（包來回車費），雖然係睇早場，但噚日電影會都爆滿，果然受歡迎。


潘兆平話，電影會睇乜嘢片，係由勞聯嘅「康樂委員會」揀嘅。勞聯會員中有個「戲院遊樂場職工會」，所以可以聯絡到戲院包場，但通常係早場，因為唔想阻住戲院做日常生意。


多睇早場 只限會員

潘生話呢啲一般係無劃位，所以到時想坐邊就坐邊，不過如果你下次想報名，可能要失望而回，事關要會員先准報名，勞聯會用短訊通知會員。查實家旺角早場睇一套電影平到20蚊都有，會員唔知又點睇呢？