夢熊彈CY婆仔數

【明報專訊】特首梁振英公布首份施政報告，究竟一班「梁粉」點睇？全國政協委員劉夢熊一於無情講，狠批CY頭痛醫頭、腳痛醫腳，完全無長遠規劃，大嘆失望咁話。佢批評施政報告只着眼於眼前問題，提出嘅措施非常瑣碎，房屋政策只係計婆仔數，成份報告都無提及經濟轉型等長遠規劃。


批報告唔講經濟轉型

佢話，CY上任前，大家都以為佢係改革者，原來不外如是。不過，劉夢熊畀分都算鬆手，話報告值65分，佢話CY始終解決到眼前問題，都算合格喎。


被人話係「梁粉」嘅何喜華，原本期望施政報告至少會就輪候公屋時間等訂立指標，但結果乜指標都無，連一次過嘅紓困措施都欠奉，佢最後畀報告50分。


羅范大讚CY有決心

雖然上述兩位仁兄對CY嘅報告唔係好滿意，但行政會議成員羅范椒芬係堅實CY粉絲，佢形容施政報告非常務實，好符合CY風格，大讚CY顯示出解決房屋、環境等問題嘅決心，提出具體數據，唔係空口講白話咁講。但佢就唔肯畀分，話最重要係CY可以落實施政報告政策，市民自然會睇到政府嘅成績。


另一「梁粉」、民建聯北區區議員劉國勳，就讚賞施政報告勾畫出未來5年藍圖，雖然驚喜唔多，但就話CY今次撥亂反正，好似跳水比賽咁，難度系數甚高，所以計埋值85分。其實佢係樓市狂潮受害者，去年同女友拉埋天窗，無奈樓價太高，暫未置業。


劉國勳嘅父母早年買咗公屋單位，家兩夫婦暫與父母同住。雖然施政報告提出復建居屋，但劉國勳同老婆啱啱過咗入息限額。佢話好多夾心階層無法受惠於資助房屋，供樓又好吃力，政府可以考慮提高申請居屋入息限額。