橙衫現身葉劉否認撐政府

【明報專訊】梁振英（CY）自選舉以來已係用橙色做主打顏色，噚日無論係政務司長林鄭月娥，抑或新民黨葉劉淑儀、工聯會王國興，都不約而同穿上非常搶眼嘅橙色外套；新民黨田北辰同民建聯葛珮帆就分別打上同圍上橙色領帶及頸巾。


林太要力撐政府就話啫，其他以橙色打扮示人嘅議員，係咁啱得咁蹺，定係有意「獻媚」？葉劉就話，橙色係今年潮流之選，強調今次撞色係「純粹巧合」喎。


范國威變身水貨客

有議員靠衣著搶鏡，新民主同盟范國威噚日就以「行為藝術」出位。一直主打港人優先議題嘅佢，喺CY宣讀施政報告期間「水貨客」上身，突然拉住裝滿奶粉同廁紙嘅手提車企圖行近CY，但全程冇嗌過口號，最後要喺保安護送下離場，其後先至重返會議廳。佢話，希望以沉默抗議嘅方式，帶出水貨客肆虐北區嘅問題喎。