新聞類別
財經
詳情#
【明報專訊】「星爺」周星馳剛剛躋身廣東省政協，下月又有新戲上畫，佢控股嘅比高集團（8220）噚日爆升一成四，收市報0.234元，係11個月高位。比高自星爺於2010年入主以來，市場等佢開戲等到頸都長，終於等到有戲上，不過似乎又係攞番舊作出來翻炒。無錯，今次又係《西遊記》，不過係「降魔篇」。
「曾經有一段刻骨銘心嘅愛情放在我面前，但我冇珍惜……」呢句《西遊記大結局之仙履奇緣》中嘅對白，唔單止香港觀眾，唔少內地朋友都識得背，唔知今次嘅「降魔篇」又會出咩經典對白呢﹖不過有一樣可以肯定，今次嘅《西遊記》唔再由星爺擔綱主演，早已退居幕後嘅星爺今次只做導演，主角則由舒淇同埋《失戀33天》內地實力派小生文章飾演。
無論在股民心中，抑或觀眾眼中，一個不成文嘅公論是，星爺做演員嘅價值遠高過佢做導演時。星爺上一部戲已係2008年嘅《長江7號》，戲分相對少，票房唔及之前嘅《功夫》，口碑也只一般。
做演員價值或遠高做導演
星爺2010年入主比高，之後公司連年虧損，舊年比高管理層曾經表示，希望這部新嘅《西遊記》可以為公司帶來盈利。
但冇星爺親自粉墨登場，恐怕始終會令一啲周星星粉絲失望。一部星爺導演嘅電影上畫，可以令比高股價升一成四，如果星爺肯出山做演員，唔知比高可以升幾多呢﹖為咗股東着想，星爺不如考慮下做番演員。
email: [email protected]
留言 (0)
