老夫子50歲玩「分身」

【明報專訊】陪伴幾代香港人成長嘅漫畫《老夫子》，原來已經50歲。屯門市廣場搞咗個「老夫子『禧』戲50年」慶祝活動，除咗展出多款1960年代嘅漫畫手稿同其他珍藏品，噚日仲請嚟《老夫子》第二代作者王澤返港主持活動開幕禮。


為咗今次展覽，主辦單位造咗一個60年代照相館同電影院，展出過百件老夫子嘅珍品，包括首次曝光、由第一代作者王家禧（筆名王澤，即係阿仔個名）當年創作嘅手稿，由黃玉郎、小克同張萬有等著名漫畫家繪畫嘅「別注紀念版」老夫子，亦有由吳興記書報社同老夫子粉絲借出嘅絕版漫畫。


活動噚日揭幕，請咗100個「粉絲」以老夫子打扮聚首一堂，王澤（前排左二）現身支持。懷舊展直至2月24日。


（尹錦恩攝）