趕路者，請包容殘障者

【明報專訊】香港復康會噚日搞咗個「無障礙城市定向」嘅活動，安排500名各界人士同殘疾人士組成90支隊伍，穿梭各區街道做各類定向活動，畀市民明白殘疾人士日常出街遇到嘅問題，今次有好幾個立法會議員參加，包括主席曾鈺成。曾主席玩完活動講感受，寄語生活節奏急促嘅香港人，對行動不便者使用公共設施及通道時要多啲耐性同包容。


曾鈺成玩定向有感而發

出席活動嘅郭惠珍50幾歲，2006年因為中風導致右手癱瘓，佢話用電梯時要以左手握扶手，而非一般人咁用右手，但有一次佢遇上一個趕時間嘅路人唔友善咁撞開咗佢，結果令佢跌倒。


復康會主席張偉良話，今屆定向重點係圍繞一啲大型商場同舊式住宅區而設，畀大家體驗大型公共設施、住宅區及交通係咪仲有障礙。因此，參加隊伍要穿梭社區，搵適合輪椅使用者用膳嘅餐廳，然後一齊食晏，再搭公共交通工具返回中環遮打道行人專用區終點。