林鄭唔幫CY評分

【明報專訊】噚日星期三，政務司長林鄭月娥無去立法會，去咗青年協會主辦嘅青年人對談活動，但並無耳根清靜啲，因遇到唔少「學生版長毛」喺活動上追問林太，有學生問：「面對港共政權，林太支唔支持市民上街？」又有學生要林鄭為特首梁振英評分，仲指明佢要「正面回應！」

噚日提問嘅23個同學大部分有備而嚟，馬同學提高聲調，指「特首689先生」對政制普選無承擔，又話香港司法制度動搖……仲有話《基本法》23條要立法，指面對「港共政權」，市民係咪應該上街？

指同學聲線感情似某議員

林鄭聽到都笑一笑，話馬同學嘅發言，「聲線同感情，令我聯想起立法會某位議員，你哋估吓係邊個啦！」佢又話：「我會坐定定，呢度唔怕有人會掟我！」引得滿堂大笑，大家心中有數林鄭講緊邊個啦。不過，林鄭都有感而發，話上任以來，話自己成日心情開朗都係呃人，感慨家嘅政治環境，曾擔心今屆政府有冇能量去處理咁多深層次問題。


林鄭之後仲話，佢有時都會因政府受到攻擊而情緒波動，不過有好多朋友支持佢，最後佢會「坐定定」，「唔會因為有人攻擊政府而退縮」。


尖銳問題一個接一個，有學生要林鄭為梁振英打分數，有學生問林鄭支唔支持梁振英下台。林鄭就反問，咁學生又會唔會幫老師打分數呢？林鄭又話，會繼續支持梁振英施政，認同梁「穩中求變」理念，希望市民畀時間。


完場前，主持人問林鄭可否為年輕人表現評分？林鄭乘機回贈幾句，話佢本來都想畀滿分，但提醒年輕人，睇問題要客觀持平，用唔同角度審視社會問題，咁先至可以攞滿分！