田少人有三急 主席特准休會

【明報專訊】立法會噚日下晝續會，繼續討論自由黨田北俊提出嘅「優化失業綜援 」動議，要求政府杜絕健全嘅人濫用失業綜援。呢個建議好有爭議，所以唔少代表基層嘅議員都發言反駁。田大少就好專心，辯論期間聽足所有人發言，但人有三急就好難忍，唯有要求主席曾鈺成批准休會，等佢去完廁所返嚟再講。


「唔想錯過任何發言」

話說噚日公民黨郭家麒準備發言時，田大少突然舉手，話希望主席可以小休兩分鐘，因為佢想去廁所，但唔想錯過任何議員嘅發言，亦唔想為咗去廁所而要求點算人數。主席聽完佢咁講，笑笑口話因應田北俊議員要求，會議暫停10分鐘，田少仲話只係兩分鐘就得。Emily未見過有咁樣嘅休會原因，但都欣賞田少咁有心，咁想聽其他議員講嘢。


呢個動議咁有爭議，代表勞工嘅議員表明反對，批評做法只係標籤申領綜援人士，製造社會分化；但亦有人贊同，認為政府有責任善用社會資源。最終，立會通過經工黨張超雄同人民力量陳志全修訂嘅動議，例如寫明學歷低、老年人搵工極難，當中部分人須申請綜援，要求政府增加培訓機會，鼓勵佢哋就業等。