嫻姐榮膺立會一姐

【明報專訊】港大民研計劃發放最新十大立法會議員評分，工聯會榮譽會長陳婉嫻（圖）以57.7分蟬聯最受歡迎立法會議員，力壓得分57.5嘅立法會主席曾鈺成，不過陳婉嫻得分只係升咗0.8分，曾鈺成得分升幅較高，有1.7分。新民黨葉劉淑儀排第3位，有54.2分，但跌咗0.3分，其餘上榜嘅十大議員，受歡迎程度都齊齊下跌。


力壓曾鈺成

自由黨田北俊同獨立謝偉俊（第7位）重新上榜，打入十大，田北俊更攀上第4位；反而工黨李卓人同公民黨梁家傑就「名落孫山」。其餘上榜議員，仲有排第5位嘅民主黨劉慧卿及第6位何俊仁、第8位人民力量黃毓民、第9位社民連梁國雄同第10位人力陳偉業，當中以陳偉業得分跌得最多，跌6.1分至40.8分，排名亦跌兩位。


民調喺今個月15號至21號進行，提名同評分階段各訪問咗約千人，評分最高抽樣誤差介乎正負1.5至2.5之間。