方國珊被指違規掛橫額

【明報專訊】區議員掛橫額直幡宣傳、動員支持者發聲係正常不過，但Emily八到西貢民政專員蕭慕蓮發畀區議會主席吳仕福嘅信，信中批評區議員方國珊（Christine）多次違規掛橫額，仲分別喺今個月兩次區議會會議上糾眾喧嘩，其中一次連職員都鬧埋，蕭慕蓮話Christine不斷漠視法紀、無理取鬧，對佢嘅行為感到遺憾咁講。


信中透露，區議會上年4月起，每次大會都討論違規懸掛橫額等物品，批評Christine至今仲係違規。今個月8號大會，當再次討論違規懸掛橫額時，就話佢安排助理叫囂，仲一齊威嚇喝罵區議會秘書處職員。信中又話Christine喺上星期四嘅房屋及環境衛生委員會，討論延長將軍澳臨時填料庫運作時，安排助理同支持者叫囂。


方指安排叫囂係「老屈」

Christine就反駁話唔少議員都有違規，專員淨係針對部分議員批評，係「選擇性失明」，又話專員「老屈」佢安排居民大聲叫囂吵鬧，質疑佢「政治不中立」，計劃向申訴專員投訴，仲話保留法律追究責任