西貢羊洲麻鷹數目創新高

【明報專訊】近日好多人講狼同熊，Emily今日同你講吓麻鷹，話說每年都有過千隻麻鷹嚟香港過冬，生態教育及資源中心每年都搞西貢麻鷹節數吓麻鷹，今年喺麻鷹出沒熱點西貢碼頭對出嘅小島羊洲，錄到歷年新高嘅數目，有480隻，多過昂船洲，升上第二，而港島區馬己仙峽道仍係最多麻鷹出沒嘅地方。


生態教育及資源中心總監程詩灝話，羊洲距西貢碼頭只有200米，企喺岸邊就可以用肉眼睇到大量麻鷹喺高空盤旋，其間不時有麻鷹俯衝落水捉魚，場面震撼。


佢又話，政府舊年9月頒布羊洲嘅發展審批地區草圖，喺規劃角度保護呢片麻鷹樂土，希望正式訂定土地用途嘅時候，將羊洲劃為自然保育區。中心又整咗個app「香港鳥類」畀市民免費下載，暫時收錄3個地區共220種雀鳥圖鑑，包括元朗、西貢同南丫島，有助辨認雀鳥品種，目前先推出Android版，遲啲推埋iPhone版。