林鄭撐CY：唔似敵我矛盾

【明報專訊】政協劉夢熊（Dream Bear）近日指控特首梁振英（CY），話CY講過與民主派關係是「敵我矛盾」。事件鬧到咁大，政務司長林鄭月娥噚日都要幫老闆講番啲好說話。被問到有無覺得CY敵視民主派，林太即刻話「無呢個感覺！」又指CY有時仲會同佢講，朝早同民主派議員食完早餐，聽咗泛民嘅一啲意見，所以睇CY嘅表現，唔似會有「敵我矛盾」嘅立場喎。


社會多意見 未必關CY

林太話，社會愈嚟愈民主，對政府批評係必然會發生，慨嘆施政要取得平衡，真係愈嚟愈難，社會意見多，與CY做特首未必有必然關係。至於佢自己，肯定唔會將民主派視為敵人，話政策要經立法會通過，唔重視各黨派意見同支持，係不切實際嘅想法。


林太早前同青年人對話，話加入政府偶有情緒波動，又擔心過呢屆政府無足夠政治能量處理好工作，但林太噚日朝係節目裏就叫大家放心，話佢當時只係唔想同學生哥耍官腔，所以先真情剖白，但話情緒問題主要係上任初期嘅事，佢家與同事都會一條心工作，佢仲搬CY嘅語句，話要迎難而上。


同CY共通點：務實

做CY下屬都好辛苦，但林太都撐CY，話過去7個月，CY畀佢最深嘅印象係好勤力，仲能量好大，可以吸納到官員提出嘅意見。林太話之前同CY無乜合作過，但家發覺兩個人都有共通點，就係佢哋都係務實嘅人，唔會只講虛空嘅說話。