麻鷹IFC企定定

【明報專訊】全國政協委員劉夢熊向特首梁振英挑戰，話若果通過唔到測謊機考驗，就會喺國金二期頂樓跳落嚟，令到國金二期呢排備受注目。Emily噚日喺社交網站睇到讀者萬小姐一張近攝猛禽相，八卦得知原來喺國金二期76樓寫字樓影嘅，難得隻鷹企定定喺窗邊任影。


Emily攞張相畀猛禽專家、生態教育及資源中心總監程詩灝睇，佢一眼就認出係麻鷹，估計有成3呎高。佢話麻鷹會喺鬧市高樓間穿插，係香港特色之一，但麻鷹警覺性高，好少會企喺窗邊任影，佢話拍攝者好彩，仲話呢張佳作確係可遇不可求。


近排市民興講熊與狼嘅故事，唔知呢隻鷹企喺國金二期，係咪幫緊熊睇位呢？