阿人希望來年「蛇吞狼」

【明報專訊】全國政協委員劉夢熊（Dream Bear）單嘢餘波未了，政壇中人議論紛紛。工黨主席李卓人話，香港家變咗「動物農莊」，先係「豬狼鬥」，家就「熊狼鬥」，希望新一年蛇年大家都做「蛇吞狼」喎！社民連主席梁國雄就話，近日稱病嘅Dream Bear其實係患咗「政治病」。


長毛：夢熊「政治病」心藥醫

阿人噚日喺城大施政報告論壇話，香港舊年開始變咗「動物農莊」，先有唐英年梁振英（CY）爭做特首嘅豬狼鬥，近期狼英被指咬傷Dream Bear，搞到Dream Bear上個禮拜大爆狼英內幕。佢話來年係蛇年，希望市民7月1日個個做蛇，因為蛇係乜都吞得落，咁就可以吞咗隻狼落肚！


至於同場嘅長毛，就話「重中之重」嘅Dream Bear稱病無嚟論壇，其實係「百分之四百政治病」，仲叫佢心病還須心藥醫。長毛又批評CY一直話「適當時候回應」事件，話如果同學交功課都可以咁講就好喇！


填詞人改曲講夢熊心聲

另外，無綫電視劇《老表，你好嘢！》主題曲《大家》填詞人梁栢堅，噚日將《舊歡如夢》改為《舊歡如夢熊》，新歌詞話「忠熊於今已丟人，未許再續情份」、「跳樓威迫IFC，恨CY太忍」。而《夢醒時分》嘅改詞，就有「早知道梁生總是冷面的，你又何苦一往情深」、「要知道行刑總是難免的 」，唔知係咪道盡Dream Bear心情呢？