陳健波請翻譯冧粉絲

【明報專訊】立法會好幾位議員都提倡過要提升本港英文水平，不過，唔少議員發言仲係只講中文，唔識中文嘅人可能一頭霧水。保險界陳健波話，佢唔少選民係外國人，喺佢做立法會議員初期，佢就某啲議題發言之後，就有選民話唔知佢講乜，於是佢請人將發言重點翻譯為英文，等選民知佢做緊乜。


陳健波話呢筆費用唔細，英文翻譯係專業，請人要收兩蚊一個字，所以今屆會期開始，請咗一個港大畢業生，原本諗住搵佢做埋翻譯。不過，始終立法會發言範疇多，即使係大學生，好多字都未必能夠準確翻譯，所以都係需要繼續請人做翻譯。


其實，立法會秘書處喺會議後都有提供逐字記錄本，同樣有英文版，但就需時四五個星期，而陳健波請人幫手就只需幾日，為咗畀選民更快知道佢嘅工作，呢啲開支唔少得。佢話，譯晒成篇發言稿好貴，所以只會翻譯發言重點。