恒生幫雲南村民 建沼氣池發電

【明報專訊】最近恒生銀行（0011）真喺活動多籮籮，一邊要忙住搞前海跨境貸款，另一邊又要入農村做義工，為建設祖國大業出錢又出力，果然十分有心﹗話說2007年開始，恒生一直都有舉辦「雲南沼氣能源計劃」，幫當地村民建沼氣池發電，兼改建埋豬欄、洗手間同廚房。而今年由於公司80大壽，建池數量更加碼到800個，係歷來最多﹗


恒生話，至今已經幫雲南村民興建咗3000個沼氣設施，受惠群眾有12,000人咁多。因為村民唔使再上山斬柴嚟燒，當地每年得以保存一大片樹林，面積相當於130個維園咁大﹗希望啲百年老企下次擺大壽之餘，都好似恒生咁，做多啲善事，幫助吓啲有需要嘅人啦﹗