大輝唐唐談狼熊鬥笑晒

【明報專訊】全國政協委員劉夢熊（Dream Bear）早前爆料，話特首梁振英（CY）講過建制派唐、梁營之爭係「人民內部矛盾」，唐唐好朋友林大輝噚日話，夢熊專訪出街後同唐唐通過電傾呢件事，大輝仲同唐唐講，Dream Bear同CY都應該拎多啲證據出嚟，據講唐唐都好同意。大輝個人覺得CY唔應該咁「心胸廣闊」，如果Dream Bear講錯嘢，CY應該告佢誹謗，但唐唐就無表態，聽到只係「哈哈哈哈」笑喎！


若有人講錯嘢 大輝叫CY告誹謗

CY上場時講過香港只有「香港營」，大輝噚日話，佢早前聽到CY咁講，都有「一剎那感動」，仲「麻醉咗幾個月」，但後來愈來愈發現呢句只係一句「口號」。佢認為任何矛盾要磨合，都要付出真心真意，希望唐營、梁營或至何營領導，都做好橋樑角色，身先士卒，最好可以安排到一次喺電視機面前嘅3人歷史性見面就最好。


Dream Bear咁谷氣，大輝話，佢可能無睇歷史，所謂「飛鳥盡，良弓藏，狡兔死、走狗烹」（諷刺一啲只可共患難不可同享樂嘅人），中國過去都有好多例子，認為夢熊應一早睇化喎。大輝又叫夢熊如果覺得今次跌眼鏡，不如2017重新搵過個人支持。


近排「瞓覺都笑」

Dream Bear近排心口翳，咁大輝近排心情點呢，佢話「瞓覺都笑」，又話唐唐近排心情同佢一樣，「都係笑」喎。