陳家亮掌中大醫學院呼聲高

【明報專訊】中大醫學院前院長霍泰輝教授今年1月升做副校長，Emily八到醫學院院長個空缺，會由校長沈祖堯嘅得意門生，內科及藥物治療學系教授、中大消化疾病研究所總監陳家亮教授（Francis，圖）暫任，至遴選委員會有最後決定。據Emily所知，陳家亮當醫學院院長嘅呼聲最高。


Emily打電話畀Francis，問佢係咪跟師父沈祖堯一樣棄醫從政（行政）掌醫學院，呢位消化疾病專家承認遴選委員已會見咗佢，但仲要等委員會決定。佢話做院長會犧牲臨牀同做研究嘅機會，但佢係中大醫學院一手培訓出嚟，好想回報母校，為醫學院凝聚力量，為本港醫學發展與中大團隊拼出個未來。


Francis嘅履歷好犀利，1988年畢業於中大醫學院、1991年愛爾蘭皇家內科醫學院院士、1992年英國皇家內科醫學院院士、1998年中大醫學博士，佢同沈祖堯教授獲頒臨牀治療獎，佢自己就攞過「優秀醫學科研學者獎」等。