民主黨推「鬥快下台魚蝦蟹」

【明報專訊】相信唔少人同親朋戚友拜年時都鍾意小賭怡情，過去只會喺維園年宵寄賣普通精品嘅民主黨，今次就「公然賣賭具」，推出名為「鬥快下台魚蝦蟹」嘅自家製遊戲，希望大家玩樂之餘亦可輕鬆接觸政治。


話唔係鼓吹賭風

呢副遊戲同坊間嘅魚蝦蟹玩法一樣，只係將啲魚、蝦、蟹等分別改成「大話英」（梁振英）、「哨牙仔」（劉江華）、「中策波」（邵善波）、「飯焦」（羅范椒芬）、「唔得掂」（吳克儉）同「劏房波」（陳茂波），每套盛惠38蚊。


佢哋話絕對唔係鼓吹賭風，只係想大家新年時有得笑吓玩吓，市民屆時喺民主黨攤位時，仲可即場試玩，佢哋會提供近期近乎斷市嘅花生畀大家落注喎。


「輸都變贏」tee向劉華「致敬」

除咗玩具，民主黨亦推出新年特別版tee，紅底金字，大大隻字寫住「輸都變贏」，唔使問都知係向由選舉落敗，轉身成為官場新貴嘅政制及內地事務副局長劉江華「致敬」，每件99元正。


民主黨今年首次投咗兩個攤位，舖租已經使咗6萬蚊，所以希望推出一啲反傳統產品吸金，啱啱做咗該黨創意媒體部長嘅黎敬瑋坦言好大壓力，呼籲大家多多支持。


另外，何俊仁同已離開立法會嘅張文光，屆時都會為市民寫揮春，咁新主席劉慧卿就會負責——站台揮手！