心腹過檔 方國珊哭了

【明報專訊】西貢區議員方國珊嘅議員助理崔定邦，早排過檔自由黨做地區幹事，本來挖角過檔係正常商業行為，但方國珊傷心到同班記者大講呢件事，點解呢？除咗因為2010年崔定邦撐佢退出自由黨，仲一齊鬧田北俊，方國珊話阿邦不辭而別，竟然連辭職信都冇，就咁放低鎖匙就走咗。


崔定邦幫咗5年

崔定邦幫咗方國珊5年，已經貴為議員辦事處嘅總幹事，甚至連方國珊喺日出康城嘅屋企鎖匙都有。方國珊話，呢個月17號，阿邦突然喺調景嶺放低咗鎖匙同工作用手機就走咗，隔咗5日，方國珊嘅職員見到阿邦喺自由黨辦事處工作，即刻拍低影片畀方國珊過目，搞到方國珊喊咗出嚟。


方國珊話事後打電話問番阿邦，阿邦解釋話自由黨榮譽主席田北俊同主席周梁淑怡親自接見佢，所以決定過檔。阿邦喺方國珊辦事處簽嘅合約講明辭職後3個月內唔准去其他議員辦事處做，但方國珊發現份合約唔見咗，但佢唔打算控告阿邦違約，只係唔滿意自由黨用銀彈攻勢撬人。


田少：正常招聘程序

田北俊就回應記者，話係經正常程序招聘阿邦，亦冇同周太接見佢，因為一個地區幹事使乜佢哋親自見。Emily噚日未搵到阿邦，暫時求證唔到啲羅生門啦。