郝鐵川演說變催眠曲

【明報專訊】北角一間酒樓噚日大排筵席，坐滿長者，原來係「香港資深傳媒人員聯誼會」嘅聚餐，在場全部都係Emily嘅老前輩，採訪過唔少重大新聞。不過，噚日嘅嘉賓中聯辦宣傳文體部長郝鐵川發言時，似乎過於冗長沉悶，由中共十八大報告，講到中國嘅特色社會主義，連清朝嘅GDP有幾勁都講埋，唔少老前輩都忍唔住，閉目養神。


傳媒前輩瞌一陣

郝鐵川就十八大報告發表演說，唔知係咪講嘅內容已講過好多次，佢連講稿都冇就講咗成大半個鐘。佢首先力讚十八大報告有「3個好」，以及中國特色社會主義嘅道路、理論同制度，再仔細分析中國特色社會主義道路包括嘅「5個建設」等……佢亦大講中國有幾成功，仲搬埋歷史出嚟，話清朝康熙年間嘅GDP已係世界第一，又話「中國30年就走西方300年的路」。唔少在場等開餐嘅老前輩難頂睡魔，閉目養神。


講開又講，「香港資深傳媒人員聯誼會」會員唔止人數多，年紀亦有番咁上下，難怪佢哋噚日開會員大會時，都提倡將理事退休年齡由70歲延到80歲，因為若果70歲就要退休，隨時搵唔到人做。Emily在此祝各位老前輩老當益壯，身體健康。