民記預咗被狙擊

【明報專訊】年宵花市噚日開市，唔少政黨把握機會幫補來年開支，多個泛民政黨主打「反CY」兼寫揮春，建制派就唔少都揀今日至舉行開幕禮。

兩年後重返維園民建聯，主打「蛇齋餅」褔袋，又有前主席曾鈺成寫揮春，今日就有3個局長、曾鈺成同主席譚耀宗主持開幕。中西區區議員陳學鋒同Emily講，噚日已有人講粗口同向檔口做粗口手勢，佢無奈話「呢係香港文化」，睇佢要有心理準備畀人狙擊。

民主黨投兩檔，主打「鬥快落台魚蝦蟹」，主席劉慧卿講明唔係鼓勵賭博，副主席羅健熙希望市民過年食住花生，有玩。社民連就整個雲狀、寫上唐唐金句「你呃人，唔好講大話」咕，長毛住咕向CY示威，示威之餘當做宣傳，副主席吳文遠預計會賣晒喎。

公民黨拍住《陽光時務週刊》，希望將「人人落力踩CY」膠拖鞋銷貨，買鞋送過期周刊。以往年宵寫揮春主席余若薇，今年晚晚駐場，年廿九仲全日睇檔！工黨就主力賣有版畫風格環保袋，Emily覺得個design都幾靚。