利市封可種花

【明報專訊】農曆新年當然唔少得派利市，有商場今年就製作附有「種子金幣」嘅利巿封（圖），拆完利市，仲可以種出鮮花。


新鴻基旗下嘅新世紀廣場，今年喺美國訂咗一批「種子紙」嚟做利市封。顧名思義，就係張紙入面混合咗種子。新鴻基地產租務部推廣經理鄺珮禾（ Jenny） 話，中國人講意頭，好難唔派利市，為咗提倡綠色生活，所以集團用呢種創新紙張整利市封，只要將利市封上嘅「種子金幣」放入泥土淋水，佢就會自動分解，隨機種出小黃菊、兔仔花、香雪球等鮮花。Jenny 話，呢啲花種係經過精心挑選，容易種同埋適合香港氣候。不過，基於印刷限制同成本，暫時都唔能夠用晒「種子紙」嚟做成個利市封。只要喺年廿九前喺商場以電子貨幣消費滿300蚊，就可以攞到利市封。