新聞類別
港聞
詳情#
【明報專訊】立春過咗，有人話家已經係蛇年，Emily發現政界有唔少蛇仔蛇女，問責官員中，有教育局長吳克儉、食衛局政治助理陳凱欣；立法會就有街工梁耀忠同民協馮檢基，原來上述3位男士都係踏入60歲花甲之年。
犯太歲 阿忠小心言行舉止
梁耀忠（阿忠）同馮檢基（阿基）一直喺立法會都係一人黨，其中，1995年已入當時立法局嘅阿忠，慨嘆時光飛逝，唔忿氣咁多年嚟做到嘅嘢唔係好多。阿忠話今年犯太歲，自己言行舉止都會小心啲，避免不必要尷尬，又希望同事靈活變通面對愈嚟愈差嘅政治經濟環境。
至於新一年目標，阿忠話今年會寫書，主角係佢服務過嘅救生員，呢位救生員因為工作條頸受傷，全身癱瘓，但係憑毅力讀完大學，仲可以幫傷殘人士。阿忠又話，蛇係機巧靈活，希望個人或者社會面對困難，都可機智處理問題咁話。
阿基大搞民協改革
阿基係基督徒，但都認為本命年係蛇仔話事。佢之前日日凌晨三四點先瞓，搞到過勞入院，所以來年目標係每日都可以凌晨1點前瞓覺，但近排都要3點，未能達標。阿基亦打算書展前出書，講上年泛民特首初選同超級區議會選舉。
擔民協大旗嘅阿基，透露今年會大手筆搞改革，從工作模式、內部組織等。佢祝願《明報》讀者身體健康，打工仔有工開、有糧出，做生意嘅貨如輪轉，人人有屋住，最後仲話「蛇王大吉」
留言 (0)
