街坊送別杏花邨老麥

【明報專訊】Emily同事成日幫襯嘅杏花邨麥當勞，開業24年後噚日最後一天，一班杏花邨街坊當然唔捨得，唔少人特登去幫襯同影相留念。杏花邨麥當勞係麥記全球第11,000間分店，噚日去幫襯同影相嘅鄧小姐話，佢住喺杏花邨廿幾年，同麥當勞一齊成長，細個時仲喺度搞過生日會，家佢結業就等同失去咗自己嘅童年回憶。


食客：失童年回憶

鄧小姐話，佢自97年移民新加坡後，每年返嚟間麥記都「縮水」，店內嘅許願池早已不存在，家非常唔捨得。


另一顧客陳伯伯話自己睇住呢間麥記開張，食足24年，一星期食兩次，以後佢少咗個選擇，唯有轉為幫襯附近炸雞店。店長話噚日生意額比平時明顯多好多，因為好多街坊幫襯；麥記就話家正同業主磋商租約事宜，雖然不便透露內容，但就非常感謝杏花邨居民多年來嘅支持同愛戴。