愛港力辣妹話「關你叉事」被嘟

【明報專訊】港台節目《議事論事》早前搵咗社民連主席梁國雄、民建聯副主席蔣麗芸、愛護香港力量嘅陳淨心、學民思潮黃之鋒等一齊做節目，雖然噚日情人節播出，但現場氣氛就好似大年初三赤口一樣，仲有人疑於激辯期間忍唔住爆粗，令節目「嘟」咗佢，隨即成為網民熱話。


質疑港台播港英旗誤導市民

陳淨心向來惹火，喺節目中開口就好似要鬧交咁，主持人問佢會唔會有興趣從政，佢就話自己對政治無興趣，只係睇唔過眼議會內有人鬧完十幾分鐘就走，但每月都有8萬幾蚊，明顯衝住長毛嚟講。講到有人高舉港英旗時，陳淨心連港台都鬧埋，質疑港台係咪支持港獨，話佢哋播出有人拎住港英旗嘅片段，係誤導市民，以為港獨有討論空間，搞到主持李鵬飛都忍唔住插嘴，話港台係有新聞自由。


長毛指係「政權嘅一條狗」

後來大家討論遊行問題，有嘉賓批評愛港力遊行有暴力，陳淨心先解畫話只局限個別嘅人，再反指「反對派」遊行唔依警方路線，去衝、去瞓馬路，長毛忍唔住批評陳淨心係「政權嘅一條狗」，令到陳淨心發火，指住長毛問佢「你講乜嘢呀？」長毛再問陳係咪建制派，陳就一句「我係咪建制派關你X事呀」嚟回應，就係呢句話，節目便出現「嘟」一聲喇，Emily問咗現場人士，原來佢講咗個叉字！