莫錦貴借下籤諷何君堯

【明報專訊】鄉議局主席劉皇發日前喺車公廟為香港求得下籤，籤文仲叫大家要「宜慎小人」，沙田鄉事委員會噚日舉行新春團拜，該會主席莫錦貴致辭時，就借籤文揶揄屯門鄉事委員會主席何君堯。貴哥叫大家唔使太過擔心小人，事關小人周圍都係，只要眼睛雪亮，小人奸計就唔會得逞。佢特別提到喺村屋僭建申報問題上，都有小人喺度整蠱作怪，煽動村民唔好申報，事實證明鄉委會處理方法正確，因為有啲「誤信讒言」冇申報嘅村民已經畀政府告緊喎。佢言下嘅小人，明顯係暗諷發起不申報運動嘅何君堯啦。


陳克勤暗示女友未允結婚

民建聯陳克勤噚日亦有到場恭賀，克勤喺兔年時講過想同拍拖多年嘅女友拉埋天窗，但到蛇年都未成事，莫非因佢工作太忙所致？佢就話結婚呢家嘢「唔係佢想就得」，暗示要女友應承至。至於噚晚情人節點過呢，克勤話自己要出席三兩場春茗活動，但佢同女友日日都係情人節喎。