財爺藉柴崎幸硬銷飛機維修

【明報專訊】財爺曾俊華應該正在忙於撰寫財政預算案，但仲有時間煲日劇，仲藉舊劇集《夢想飛行Good Luck》，話航空業前景佳，叫年輕人投身，但佢唔係推介大家去做木村拓哉飾演嘅機師，而係女主角柴崎幸扮演嘅飛機維修員。


財爺話上月底訪問香港飛機工程公司，見到有一架冇載客嘅747專程由美國飛到香港大修，證明香港業界喺呢方面好有競爭力。財爺借題發揮，佢又話日劇中一幕，柴崎幸唔小心將工具留咗喺引擎內，畀主管罵個半死。佢話維修員犯錯嘅後果，比醫護人員將手術用具留喺病人體內仲嚴重得多，所以飛機維修員除咗要有良好訓練，更必須非常細心。


管理層呻請人難

不過，港機公司管理層同財爺講佢哋請人好難，因為有唔少獲聘見習技術員半年後就走人。箇中原因好多，如停機坪工作日曬雨淋辛苦、去機場返工長途跋涉，也有啲係因為家人覺得飛機維修係「藍領」工作而被「勸退」等等。


財爺同年輕人講，飛機維修業有好大發展空間，年輕人入行門檻唔算好高，可以報讀職業訓練局嘅飛機維修高級文憑課程，業界有在職培訓，肯努力就可以成為獨當一面嘅專業飛機維修工程師。