傳唐太被控 盛智文feel bad

【明報專訊】唐宮僭建大地庫，有傳唐英年嘅太太會被人告，身為唐營一分子嘅海洋公園主席盛智文話佢「feel bad」，好同情唐唐，仲話唐唐已受到好大懲罰，喺特首選舉失敗，無咗成個事業。


暗批煲呔留「蘇州屎」

做慣老細嘅盛智文噚日喺傳媒飯局話，呢個世界無差嘅員工，只有差嘅老闆，因為員工做乜，都係老細話事，咁做咗半年特首嘅梁振英做得好唔好呢？好識做嘅盛智文就話，CY只係做咗半年，要畀啲時間佢，香港家最需要解決房屋問題，否則港人無希望，會乜嘢都怨，政府想做乜都做唔到，但呢啲都係前朝無規劃遺留落嚟嘅問題。佢雖然無點名批評曾蔭權，但呢句話相信都算係暗批煲呔啦啩。


另外，對唐太有可能惹官非，新民黨田北辰話非常心噏，話晒識咗唐唐兩公婆咁多年，認為若唐唐早知件事會令太太隨時被刑事檢控，當日就唔會咁樣講嘢喎。