夢熊密函 白韞六﹕未驚過

【明報專訊】廉署噚日喺總部舉行新春傳媒茶敘，Emily同一眾行家見到專員白韞六，自然問起近來火熱話題，即傳媒近日收到一封疑似劉夢熊致特首梁振英嘅「密函」，要求CY向白sir「打招呼」，要求佢嘅手下「慎之又慎」。


被問到會否「慎之又慎」，白sir話廉署「無壓力、未驚過」。但Emily追問起案情，佢即時密密實實，無可奉告，並重申港人對貪污「零容忍」，仲引述有調查指若0分代表完全不容忍，港人平均分只係0.8。


口供紙派街坊要坐監

講起近日大量政黨大鑼大鼓湧去廉署「報案」，要求徹查高官嘅涉嫌失當行為，白sir話時代已經唔同，1970年代嘅舉報者，會問廉署職員有冇後門畀佢走人，家嘅人就高調報案。


對於外界關注會否有人藉報案攻擊或傷害他人名聲，白sir話佢都有留意，此情况長遠「要處理」，點出任何人舉報涉防賄條例嘅案件，調查人員都會提醒投訴人不要透露被調查對象，佢話，去年5月一名喺灣仔廣泰樓經營車房男子，因關注大廈法團貪污，去廉署報案後將口供紙大量複印派街坊，被控後罪成入獄。


廉署從冇測謊機

對於dream bear 最愛嘅測謊機，有資深廉署調查人員就笑謂，測謊機測出嘅結果並不準確，因此廉署成立以來，都沒有此設備。