馬恩國爆粗鬧長毛

【明報專訊】立法會政制事務委員會噚日開會，本來傾聯合國《公民權利和政治權利國際公約》落實情况，但結果惹來梁國雄與民建聯成員馬恩國罵戰，連英文粗口都出埋。


本身係監警會委員、大律師嘅馬恩國，發言時就話有示威者假自由之名，搞到香港好混亂，隨時變成內戰。社民連梁國雄聽完之後，一步步好似審犯咁審佢，先踢爆佢係民建聯司法及法律事務副發言人，仲係山西省政協，上個月講過贊同全國人大委員長吳邦國「中國不能搞三權分立」觀點，仲話佢應徵過副局長。


「You're not even a fxxking Chinese」

馬恩國睇嚟撻着把火，用英文大鬧「我有潛質，你無；我有大學學位，你無；我有澳洲護照，你無！」馬恩國跟住又連珠發炮，質疑「民建聯就唔啱呀？我愛港愛國有乜唔啱呀？反政府就啱呀……唔係教訓香港人，係教訓你啫！」，仲用英文爆粗「You're not even a fxxking Chinese（你連一個中國人都不如）」，長毛就還以顏色大叫「Liar（騙子）」。委員會主席譚耀宗見到都「嘆為觀止」，最後喝令兩人收聲。