梁美芬遊青島睇富豪菜田

【明報專訊】新春期間唔少建制團體都舉辦酒會聯誼，噚日中聯辦九龍工作部酒會，立法會議員李慧琼、陳鑑林、梁美芬等都有出席。近日經常紅噹噹咁現身嘅李慧琼（Starry）話，做咗「超級議員」，挑戰真係好多，呢類酒會亦要走好多場，剛過去嘅周日就有8場酒會，真係頭都痛埋咁話。


梁：馬恩國要政治鍛煉

Starry話佢新年無離開香港，但近日要不斷去酒會，因為新春係大好機會同地區人士聯誼，特別係選舉完結無耐，唔想令人覺得佢選完就唔見人咁。


至於新年期間，梁美芬就同屋企人去咗青島嶗山玩咗幾日，佢話最深刻嘅係見識到，原來內地唔少富豪近年自己買地種菜，因為內地嘅食物安全問題都幾嚴重吓，所以佢有朋友喺青島買咗一個山頭，請農民種菜、養羊，盡可能食番自家製嘅食物。


前日民建聯馬恩國同社民連梁國雄喺立法會開火，梁美芬話佢識咗馬恩國都有一兩年，佢覺得馬恩國好爽直、好有主見，但就覺得政治上需要鍛煉，唔好咁易被人激親。