謝偉俊收香吻冧爆

【明報專訊】立法會議員謝偉俊（Paul）同伴侶白姐姐一向都好恩愛，成日雙雙現身公開活動，不過，被指為「西環契仔」嘅阿Paul，噚日就單拖現身中聯辦九龍工作部酒會。上星期四係情人節，Emily問阿Paul情人節點過，阿Paul鬼馬咁話，唔知白姐姐算唔算係情人，反問Emily老婆係咪情人呢。


「白姐姐梗係情人」

Emily唔識答，阿Paul就話無選擇，白姐姐梗係情人！而因為有朋友開花店，咁方便，所以送咗紥花畀白姐姐，當日兩人睇咗3套戲，包括《西遊．降魔篇》、《驚慄大師：希治閣》、《當總統遇見皇上》，阿Paul就話平日佢哋一日可以睇六七套，所以情人節當日算少喇。白姐姐送咗乜嘢禮物畀佢呢？阿Paul聽到呢個問題，即刻甜絲絲咁嘟起個嘴向前傾，話白姐姐係獻上香吻！


指關係「高潮迭起」

阿Paul話佢同白姐姐喺1989年已經一齊至今，中間有暗湧，但佢覺得兩人相處最緊要有空間，又話要不斷試新嘢，好似參選、從政咁，因為男女之間最怕有悶局，家佢同白姐姐都會互相分享從政嘅事，仲形容兩人關係可以話係「高潮迭起」。