三馬網上賣保險獲批 馬雲擬建銀行

【明報專訊】去年在內地轟動一時的「三馬合伙賣保險」，終於在蛇年開春，有了實質進展。《上海證券報》昨天爆料，平安保險（2318）的馬明哲、阿里巴巴的馬雲（小圖）和騰訊（0700）的馬化騰三人聯手設立眾安在線財產保險公司，已快走完監管審批，中國保監會好快就會正式發出同意籌建的文件。


以責任保證險為主 含金量高

呢種網上賣保險，即係無分支機構，無Sales當街拉客，全程業務都係網上完成，包括銷售和索賠，銷售的產品就以責任險、保證險為主，小琴聽聞，呢兩種非車險的專業險種，雖然好難似車險咁做大規模，但含金量最高，即係利潤、價值極之誘惑。不過，呢個合資的公司就唔會由呢三位巨頭出面，而是一位備受三位大佬好評的神秘富商，百仕達主席歐亞平。


馬雲擬全國設7金融中心

另一邊廂，《中華工商時報》又搵到知情人士話，馬雲今年要在全國設立7個金融中心，業務就以擔保為主打，以前的小額貸款會陸續退出，馬雲雄心勃勃，聽聞仲要係未來5年之內申辦自己的銀行。馬雲有個2013年戰略，阿里金融要轉型，擴張方向即從係阿里小貸轉向擔保業。