新聞類別
財經
詳情#
【明報專訊】香港商場愈愈冇特色，唔係名店就係連鎖店，總之外表各有不同，但入面個個都好似倒模咁。噚日置富產業信託（0778）個午宴度見到主席趙國雄，勢估唔到佢都係茶記、士多「粉絲」，仲話唔多鍾意去百佳喎。小琴一聽當堂打個突，事關百佳係同系和黃的子公司，置富唔少商場都見到百佳蹤影，無理由咁彈自己公司。
「幫襯百佳好冇feel（感覺），個收銀好似機器咁，望都唔望你就係咁嘟」趙生就話，雖然百佳有教員工，見到人要打招呼，但係去畀錢陣，佢都係不停將貨物過機，同客人零交流。佢仲一路講，一路扮收銀，「好似機器咁，你話係咪冇feel呀。」
愛士多茶餐廳
佢鍾意以前士多、茶記，可能買食要畀貴少少，但起碼入到去，個老闆會同你傾幾句交流，晒佢嘴型。不過，租金咁貴趕絕唔少小商戶，搞到冇香港特色好可惜。所以佢要求置富商場，唔可以一味得名牌、連鎖店，要保留番地區特色舖頭仔咁話。
「香港發展唔可以靠晒幾個大集團，要加埋好多中小企先得」。佢仲好語重心長咁講，話要扶持多小商戶，咁樣先有健康發展。
email: [email protected]
留言 (0)
