周日渣馬增200醫療人手

【明報專訊】周日就係渣打馬拉松，今年破紀錄有7.2萬人參加，為確保參賽者可順利完成賽事，大會安排咗800個醫療人員，比去年多約200人，而港島、九龍同新界南都會有封路安排，無論有無參加比賽嘅讀者都要留意喇。


溫度17℃至22℃

舊年馬拉松好不幸發生跑手一死兩危悲劇，馬拉松籌委會主席高威林噚日不厭其煩託Emily提醒參賽者，一定要量力而為，前一晚早啲瞓、休息充足。周日氣溫介乎17℃至22℃，幾適合跑馬拉松，但係大會都會做足準備，800名醫療人員包括30個醫生同50個護士，又會設醫療巡邏小隊同瞭望塔。


到時青嶼幹線大嶼山往九龍方向只開下層，往屯門同元朗等亦要改道，封路由周六晚11點開始，至比賽當日下午1點半逐步解封。西九龍區封路包括尖沙嘴、佐敦一帶，由凌晨12點45分至翌晨9點45分逐步解封。港島方面，就由凌晨2點15分至當日下午2點15分，範圍覆蓋筲箕灣至中西區。另外，今年首辦嘅半馬輪椅賽有4人參賽，3公里賽則有42人，市民不妨去打打氣。