懲教署派博士跑渣馬

【明報專訊】周日就係渣打馬拉松，懲教署助理署長簡志強話，佢哋今年有150人參加10公里「紀律部隊挑戰盃」，近日積極備戰，希望可再上一層樓。Emily就覺得，要數部門嘅風頭躉，肯定係有博士銜頭嘅懲教主任陳國璋。


博士跑手肥仔跑到瘦

29歲嘅陳國璋10年前已跑馬拉松，原來佢中一時體育科唔及格，自從愛上跑步，就逐步變成瘦身型男。最難忘係2010年佢一邊入職受訓，一邊要趕博士論文，還幸部門通融，終能完成港大博士課程。懲教署嘅長跑隊教練、一級懲教助理吳輝揚，喺92年跑出2小時24分52秒香港華人馬拉松紀錄後，20年來冇人破到，勁！


今年參賽者星味甚濃，好似美國總商會前主席詹康信愛女Jennifer Harvey，今年拍住嗲哋參賽；九倉主席吳光正囝囝吳宗權亦會父子檔登場。另一pair星級跑手，係證監會前主席方正同佢太太方黃吉雯。