陳家洛立會Q王

【明報專訊】每年財政預算案發表後，立法會議員都向政府提出大量書面問題。過去兩年嘅「Q王」係公民黨陳淑莊，今年佢唔喺議會，新丁黨友陳家洛接力以500幾條問題成為新Q王。


家洛話，早前見到政務司長林鄭月娥，得知自己係問得最多問題嘅議員，主要圍繞民政同教育。佢計劃提出多項修訂，包括刪走成個中策組嘅開支、減教育局長吳克儉一年嘅人工，以表達社會對佢處理國民教育科風波嘅不滿喎。


指劉華聯國開會照紙仔讀

佢剛去咗日內瓦出席聯合國人權會議，話聯合國好關注香港政制發展，仲話佢哋過去早已講明，東歐共產國家行嘅預選制度係不民主，呼籲政府唔好諗住拋個有預選嘅特首普選方案出嚟，以為可以僥倖過關。佢又話，首次以政制及內地事務局副局長身分去聯合國嘅劉江華，會上發言係照紙仔讀，「讀得好辛苦、好慢」。


陳淑莊話入黨因貪慕虛榮

講開又講，公民黨7周年黨慶，叫黨員剖白點解入黨，副主席陳淑莊好坦白，「因為我貪慕虛榮」；毛孟靜就話「for fun」；有年輕黨員話「太得閒」！佢哋仲講埋預期15年後公民黨會點，陳淑莊話公民黨最好「摺咗」，期望有真普選，佢哋任務就完成。黨魁梁家傑就唔係好同意，佢認為15年後，公民黨依然要以捍衛人權法治為己任喎。