真普聯logo誕生

【明報專訊】泛民今日正式成立新政改平台「真普選聯盟」，聯盟要有氣勢，除咗人之外，標誌亦好重要。喺大學主修設計嘅新民主同盟議員范國威（Gary）就肩負起呢個重任，花咗兩日時間設計咗8款logo畀大家選擇。


設計8款任揀

Gary一向都為自己設計宣傳品，其中佢喺選舉期間嘅超大型人像易拉架就最令人印象深刻，唔少民陣嘅T-shirt設計都出自佢手筆。Gary話，設計logo最重要係慢慢試，而logo嘅「惡搞容易度」亦相當重要，好似佢本身設計咗一個民眾「舉手」嘅logo，但由於有啲似人民力量嘅logo，亦好易被人惡搞成「舉中指」，佢最終都冇向泛民嘅朋友推薦。


大聯盟最終採用咗簡單嘅中文字造型設計，喺「真普選聯盟」嘅「普」字加咗個紅色「??」號，突顯佢哋嘅目標﹕希望人人有票投，被選同選舉權都均等。