Ann姐話卿姐若薇做唔掂特首

【明報專訊】民主黨主席劉慧卿噚日喺立法會好忙碌，周圍搵建制派議員出席佢主持嘅網台節目《議會內外》，佢話搵自己友講嘢唔難，但搵建制派就有難度，但佢噚日成績唔錯，民建聯蔣麗芸（Ann姐）一口答應。兩位阿姐都以講嘢大聲聞名，不過卿姐就話，講到聲量，一定唔夠Ann姐嚟，仲話Ann姐言論有趣，每當Ann姐喺立法會講嘢，一定會豎起耳朵留心聽喎。


Ann姐話唔會介意同唔同政見嘅人溝通，又搬出佢嘅英文格言，如想與人為善，「You talk to your enemies.（應跟敵人對話）！」卿姐就好急才，即話自己英文名叫Emily，唔喺enemy呀！

卿姐函一哥促查記者收刀

卿姐話，至少已搵到經民聯林健鋒、好友何秀蘭同埋新民黨葉劉淑儀出席節目。卿姐係前傳媒人，好關心傳媒事，佢噚日就去信警務處長曾偉雄，要求警方嚴肅處理無綫電視主播吳璟儁日前收到「軍刀」嘅恐嚇事件，要求警方保障新聞工作者人身安全。


Ann姐噚日亦好忙，因為好多記者搵佢回應特首選舉事件，佢不忘發揮寸嘴本色，講笑咁話，就算畀卿姐、公民黨余若薇或梁家傑做特首又如何，只怕佢哋做唔掂，因為特首要同中央溝通，擔心佢哋做唔到。