電盈「小股東」 角色大衝突

【明報專訊】一個人身分太多，有時都真係幾頭痛。話說噚日成班電訊商上立法會，就住政府收唔收番3G頻譜拍賣單，同通訊事務管理局個正面交鋒。電盈（0008）小股東大聯盟，都有代表去到。不過，咪以為係見慣見熟位「翔仔」陳仲翔呀，雖則佢都有，但竟然係代表民建聯。點知畀小琴見到佢。

民建聯支持重拍 本身又持股份

大家可能覺得無咩特別，但奇就奇在大聯盟係撐電訊商，支持3G牌到期之後自動續牌。至於，民建聯就贊成政府收番頻譜重拍去引入競爭，陳仲翔噚日就以政策副發言人身分去發言。小琴覺得成件事好似自己打自己咁，唔通陳仲翔已經對電盈完全死心，決定放晒股票？

佢就同小琴講，話一個人都有好多重身分，好易有衝突。由於佢係民建聯個經濟發言人，3G牌咪關佢事囉。咁班黨友們亦都知陳仲翔同時係大聯盟成員，所以今次佢就唔發表任何個人意見，保持中立咁話，仲約小琴到時電盈股東會見。

講番個聽證會，幾多議員都無確實表態，支持定反對收番頻譜，但係要通訊局交代清楚，到底收番係咪只係影響電訊服務質素18%咁少。通訊局副總監夏勇權就話，已搵緊外國獨立顧問去評估，10月份會有公布。