卿姐議辦公開「偷遮賊照」

【明報專訊】民主黨立法會議員劉慧卿同黨友區鎮樺區議員喺大埔大元邨嘅辦事處，呢兩日門口貼咗多張閉路電視拍到嘅連環照片，將兩個懷疑偷遮賊「犯案」過程「示眾」。區鎮樺話將疑犯公之於世，只係想「提醒」街坊唔好以身試法。至於怕唔怕被指侵犯私隱或手法太盡，區就解釋，相中人容貌模糊，相信其他人未必認得出，但如果街坊對做法有意見，希望大家多提點！


講明門外攝錄 防有人小解

區鎮樺話，佢同卿姐嘅辦事處前後門都裝咗閉路電視，因為以前偶爾會有人喺門口小解！佢亦喺門外貼告示講明有閉路電視，唔知點解仲有人唔知驚。上周五發生兩宗雨傘失竊案，職員將濕咗嘅遮暫放門外，隔一陣就被人攞咗，估計應該係街坊行過，咁啱落雨，一時貪方便攞去用。區鎮樺話無諗過追究，否則將片段交畀警方，好易拉到人。


被貼街招侮辱 麥業成報警

「偷遮」算小事，元朗區議員麥業成就慘啲。曾經同人民力量陳偉業拍檔嘅佢，上周被人喺佢選區貼街招，內容有侮辱成分。麥業成同Emily訴苦，話早前收到米埔一個非原居民求助，嗰度雖然唔係佢選區，但佢都去幫手，原來求助者同原居民地主有土地糾紛，求助人話用咗一幅農地40年，想申請「逆權侵佔」爭取業權。麥業成話佢都係叫雙方透過正常法律程序處理，但就可能得罪一啲人，懷疑係咁被人貼街招鬧。


麥業成話呢啲街招內容有恐嚇成分，佢唔係好驚，反而覺得「幾搞笑」，但老婆就有啲擔心，所以佢上個禮拜去咗警署報案。