只要夠熱 黃錦星畀阿女開冷氣

【明報專訊】環境局長黃錦星形象環保，佢一直話夏天夜晚喺屋企都唔會開冷氣，不過為咗讀緊中五嘅寶貝女，有時都會破例。佢噚日接受港台《舊日的足跡》訪問，話屋企個廳無安裝冷氣，間房雖然有裝，但都盡量唔開。不過佢同阿女有協議，如果夜晚達到天文台熱夜嘅定義，即28℃，就可以開冷氣。局長話佢都受惠於每個月150蚊嘅電費補貼，好耐無交過電費。


減碳排 旅行要近

黃局長話簡約生活都可以好開心，好似佢咁，每年全家都會去一次旅行，為咗減低碳排放，會去近啲嘅地方，例如日本。其中一年去京都，喺和歌山縣高野山嘅民宿住咗兩三日，晚上聽到蟬聲同青蛙叫聲，感受大自然氣息。


嘆污染勁 懷念少年觀星

今日係地球日，黃錦星話日日都應該係地球日，間中熄燈同食素係唔夠嘅，應持之以恆，先至有機會改善環境。佢諗番讀書時去露營，深夜同埋同學一邊睇星，一齊唱關正傑嘅《星》，好有氣氛，但因為空氣污染，近日朝早開窗只見一片迷濛，希望遲啲喺香港可以觀星。局長唔知係咪暗示，香港除咗空氣污染，仲有嚴重嘅光污染問題。