梁太讚CY 誠實正直

【明報專訊】特首梁振英（CY）早前捲入僭建風波等事件，最多人對佢嘅批評就係話佢「你呃人」，但喺佢太太眼中又係另一回事，梁太唐青儀接受訪問時就幫丈夫講盡好話，大讚「他是一個正直、誠實和堅強的有心人」。


仔女辦公室印工作紙 畀番錢公司

梁太接受中華總商會刊物訪問，談當特首夫人感受。訪問中佢話以前仔女仲細時，有時會去CY嘅公司做功課，佢幫手用影印機影幾張工作紙，CY見到，都要佢計番錢畀公司，原因係辦公室唔係CY私人地方，資源唔可以隨意使用喎！梁太話丈夫係山東人，不輕易表露情感，所以比較內斂，但梁太都sell丈夫有感性一面，話CY睇戲，有時都會覺得好感動。


CY同梁太係英國布里斯托大學嘅師兄妹，梁太話二人喺一次香港舊生會活動上邂逅，一見鍾情。講起仔女，梁太就話最感欣慰係仔女青出於藍。大仔傳昕家喺英國劍橋大學攻讀博士，研究幹細胞；二女齊昕喺倫敦政治經濟學院修讀法律；細女頌昕喺劍橋修讀經濟。


梁太話一家人生活算簡樸，但夫婦二人都鍾意旅遊，3個細路喺英國讀書，二人每年農曆年會飛去探親團年，然後會順便去其他地方旅行，前年就去咗墨西哥玩。


梁太成為特首夫人，現時係62個慈善團嘅會長或贊助人。佢一向少評社會事務，但訪問中都有評論早前嘅國教科爭議，佢話身為母親，樂於見到年輕人表達意見，但話誤會往往因缺乏溝通，話多啲溝通、多啲包容，先可以建立和諧社會氣氛。