拍賣李小龍合約助保釣

【明報專訊】保釣船「啟豐二號」上年去完釣魚島宣示主權後需要大修，保釣行動委員會3月時去咗美加籌錢，保釣人士曾健成（阿牛）話，佢哋喺洛杉磯嘅籌款晚宴，得到收藏家陳燦培捐出李小龍首次同荷李活簽約拍戲嘅合約，上面有李小龍嘅親筆簽名，呢份合約將會拍賣，底價100萬元。阿牛話，合約前日已經空運抵港，佢同陳燦培下月中會開記者會講詳情。


上有簽名 底價百萬

阿牛噚日畀記者先睹為快睇吓李小龍嘅合約，阿牛話，陳燦培早年喺經濟低迷時，買咗呢份有李小龍真迹及相片嘅合約，喺佢哋去美國籌款時，對方就話捐出合約，仲定出100萬呢個底價。


陳燦培透過國泰空運呢份合約嚟香港，阿牛話，國泰聽到係李小龍物品，加上為保釣籌款，決定免費幫佢哋運港，但陳燦培亦為合約買咗100萬保險。阿牛話，由於「啟豐二號」大約需要100萬元維修，原本打算將多出嚟嘅錢捐畀「慰安婦」，但陳燦培就話，若果拍賣價再高，就建議佢哋捐畀一個助學基金。