聲光耀維港締 健力士紀錄

【明報專訊】新鴻基地產製作嘅「ICC聲光耀維港」，噚晚7點45分喺環球貿易廣場（ICC）幕牆首演，為香港締造咗「單一建築物上最大型燈光音樂表演」健力士紀錄。今次啟動禮認真好彩，事關天文台噚晚7點半發出黃雨警告，但老天爺算係咁，3分鐘嘅燈光動畫播完後先至落大雨，怪唔得公關朋友都話好彩啦。


啟動禮有新地主席兼董事總經理郭炳聯、旅遊發展局主席林建岳及李麗珊主持。佢哋同一眾來賓喺IFC嘅3樓露天平台，齊齊欣賞對岸ICC嘅表演，首季故事以「春天歷奇」為主線，大會通過電腦控制每一粒LED燈，以每秒30格速度投影到ICC幕牆，呈現流暢嘅動畫效果。


呢場show開始時天色好清，播完唔到幾分鐘就開始落大雨，雖然大會早已設置帳篷，但因為橫風橫雨，搞到大家都四散。


LED投射幕牆 每晚有得睇

郭炳聯心情唔錯，佢仲獲健力士世界紀錄認證官Charles Wharton即場頒授證書。「ICC聲光耀維港」結合音樂、故事及燈光動畫表演，帶出「心繫香港」信息，以後每晚7點45分及9點都有得睇。